Ք. Երևանում կայացած «Հայաստանի ատոմային ոլորտի զարգացման հեռանկարները» թեմայով պանելային քննարկմանը մասնակցում էին “Հայատոմ” ԳՀԻ ՓԲԸ, “Ռոսատոմ” Պետկորպորոցիայի, ՀՀ ՏԿԵ նախարարության, Հայկական ատոմային էլեկտրակայանի և էներգետիկ բնագավառի մի շարք այլ գերատեսչությունների, Երևանի և Գյումրու Գիտության և մշակույթի կենտրոնների ներկայացուցիչներ:

Միջոցառումը, որն անցկացվում է արդեն երրորդ անգամ, նվիրված էր Հայաստանի ատոմային ոլորտի 55-ամյակին: Հանդիպման նպատակը Հայաստանում մինչև 2040թ. Էներգետիկայի զարգացման ռազմավարության ծրագրի շրջանակներում ատոմային էներգետիկայի դերի շուրջ փորձագիտական քննարկման անցկացումն էր:

Հայկական ԱԷԿ-ի թիվ 2 էներգաբլոկի արդիականացման ուղղությամբ 2020թ. կատարված և ընթացիկ աշխատանքներին, ՊՆՎ-2021 ընթացքում 141-օրյա կանգին և այդ ընթացքում ռեակտորի իրանի մետաղի թրծաթողման աշխատանքներին իր խոսքում անդրադարձավ ՀԱԷԿ-ի գլխավոր ճարտարագետ Ա. Գրիգորյանը:

«ՀԱԷԿ» ՓԲԸ գլխավոր տնօրենի առաջին տեղակալ-Հայկական ԱԷԿ-ի տնօրեն Մ. Վարդանյանը ներկայացրեց կայանի շահագործման ժամկետի կրկնակի երկարաձգման ուղղությամբ տարվող աշխատանքները, որոնք հիմնված են լինելու ռուսական նմանատիպ կայանների շահագործման ժամկետի երկարացման փորձի վրա: ՀԱԷԿ-ի թիվ 2 էներգաբլոկի շահագործման ժամկետի երկարաձգումը էներգետիկ անվտանգության և սոցիալ-տնտեսական կայունության երաշխիք կհանդիսանա:

Հայաստանի ատոմային ոլորտի 55-ամյակին նվիրված միջոցառումները և ոլորտի պատասխանատուների միջև հանդիպումները շարունակական բնույթ կկրեն: